नवीन हलदूणवी
मुन्नू खूब गराड़ी कुसजो के दसणा ,
दिंदे लोक लताड़ी कुसजो के दसणा ?
दंगेई – गल़दूत्त गणैड्डे भूत्तड़ बी ,
फसलां देन जुआड़ी कुसजो के दसणा ?
तांईं गरीब ग्रांईं भुक्खे घुम्मा दे ,
किंह्यां लग्गग ध्याड़ी कुसजो के दसणा ?
सुक्खण पूरी होण लगी ऐ बोल्ला दे ,
मंग्गण पौंद भनाड़ी कुसजो के दसणा ?
बणी – ठणी नैं रोज नशेड़ी भुड़का दे ,
ढांगू – जोत – चुआड़ी कुसजो के दसणा ?
“नवीन”बणियैं बेल्लीबारस देस्से दा ,
लैणी हाक्ख गुहाड़ी कुसजो के दसणा ?
नवीन हलदूणवी
09418846773
काव्य-कुंज जसूर-176201,
जिला कांगड़ा , हिमाचल l
गीत
नवीन हलदूणवी
अपणे लक्क सधेरा दे ,
गुरुआं जो पल़चेरा दे ।
हाल बुरा ऐ सड़का दा,
काल़ख ठेक्के फेरा दे ।
लाट्टू लोई लांदा नीं ,
कुक्कड़ रोज वज़ेरा दे ।
मौज़ बड़ी ऐ बड़के दी ,
हाकम कलमां फेरा दे ।
मुल्ल पवै नीं भगती दा ,
बूस्सर अक्ख तरेरा दे ।
खबर मसालेदार खरी ,
लुच्चे जो भणघेरा दे ।
असली थोब्बड़ सुक्का दा ,
नकली जो तुलकेरा दे ।
अज्ज “नवीन” भुलाईत्ता ,
भड़ुए जो फणसेरा दे ।
नवीन हलदूणवी
09418846773
काव्य-कुंज जसूर-176201,
जिला कांगड़ा, हिमाचल।
