लाड़िया कनै लड़ोणे/सुरेश भारद्वाज निराश

हास /वयंग

कवता

लाड़िया कनै लड़ोणे दा मजा इ किछ होरै
सयालें दिन घरोणे दा मजा इ किछ होरै

राती नेहरें चलदेयां लगन जाहलु ठेड्डे
मुहें भार पौणे दा मजा इ किछ होरै

भ्यागा दी खादियो राती दा इन्तजाम नी
भुख्खें पेटें सौणे दा मजा इ किछ होरै

राती लाह्न संधां सैह घरें बगाने जाई
माल घरे जो टोहणे दा मजा इ किछ होरै

डाडां मारी कया मिलेया कुन्हीं न पुच्छी गल
चुप चुपीते रोणे दा मजा इ किछ होरै

खड़ खड़ोते खाणा टिह्ड लमकी पौणा
पैंठी भुइयाँ बौहणे दा मजा इ किछ होरै

दिनें मत जा़दा तू घरें बगाने मित्रा
राती दे प्रौणे दा मजा इ किछ होरै

रोज रोज नौहणा पाणिये दी बर्बादी
लोहडिया जो नौहणे दा मजा इ किछ होरै

लड़ी घुल़ी क्या मिलणा मोया सन्ति रख
होल़िया जो रंगोणे दा मजा इ किछ होरै

कलिष्ट शव्द लिखी करी मत बणाएं कबता
“निराश” सहज लखोणे दा मजा इ किछ होरै

अप्रकाशित/मौलिक/स्वरचित

सुरेश भरद्वाज निराश
धौलाधार कलोनी लोअर बड़ोल
पीओ दाडी धर्मशाला -176057
मो..9805385225

Leave a Reply

Your email address will not be published. Required fields are marked *