“दिक्खे”

नवीन हलदूणवी

अपणी टौहर बणाणे ब्हाल़े,
हक्क बगान्ना खांदे दिक्खे ।
चोर – उचक्के झूठे माह्णू ,
लम्मा टिक्का लांदे दिक्खे ।।

केइ पठंगी नंगधड़ंगे ,
मल़ी भभूता अलख जगाई।
बैह्मा दी बिह्ड़िया च जकड़ी,
लोक्कां जो भरमांदे दिक्खे ।।

सिद्धपणे च पौंदे धप्फे,
पुट्ठपल्लड़े न खांदे गप्फे ।
लोक्कां जो सैह्ई ठग्गमठग्गी,
खंब्बल़खच्चा पांदे दिक्खे ।।

असूलां दा देइ दित्ता पाच्छा ,
गुरपीर बणेयां इत्थू गाच्छा ।
के बोल्लां मैं सिर झुकदा ,
नक्कलां गुरु करांदे दिक्खे ।।

बोल सिआणे सुणा ओ लोक्को,
मत बणदे तुसां बुद्धू – भौंदू ।
भोल़पणे जो इस दुनियां च,
सब्बोई टरकांदे दिक्खे ।।

केइ पांडे कनैं कृष्णमुरारी ,
चोह्तचाह्त पर भाषण झाड़ी ।
उतरी स्टेजा पैह्ले सांइयों ,
सैह्इयो चोह्त मनांदे दिक्खे ।।

लोक्कां जो तां सबक सिखांदे ,
अप्पू पुट्ठिया बत्ता जांदे ।
सैह् – इ बेच ज़मीरा पैसे तांईं,
देस्से जो ठुकरांदे दिक्खे ।।

लीडरां दी बी एह्-इ नसाणी ,
दुद्धे च किच्छ पांदे पाणी ।
कनैं सब्बनां जो -इ मुंडू देइ ,
लोक्कां जो लड़ लांदे दिक्खे ।।

सच्चे दी नीं टिकदी कुर्सी ,
कुथू चली गे कविवर तुलसी ?
वगैर तिन्हां दे इस युगे च ,
सुच्चियांगल्लां हुणकुण लिक्खे??

“नवीन” न सब्बो मायाधारी ,
घरे च पल़दी चोरबज़ारी ।
अन्नींह् पेइयो कुत्ता चट्टै ,
बांदर छिंज घुल़ांदे दिक्खे ।।

नवीन हलदूणवी
09418846773
काव्य-कुंज जसूर- 176201,
जिला कांगड़ा , हिमाचल l