“ढिल्लमढिल्ला”
नवीन हलदूणवी

मछरै दुनियां नंगधड़ंगी,
भगत बणी गे अज्ज पठंगी।
लहुए-मास्से दे सभ भुक्खे,
प्रीत्तां दी टुट्टा दी डोर ।
भलमणसाई धक्के खा$ दी,
उद्दी चांदी जिद्दा जोर ।
ढिल्लमढिल्ला हर पास्सा ऐ,
कवियां दी कवता कमजोर ।।

सच बोल्लण ते सभ घबरा दे ,
झूठे दे हन गीत्तां गा$ दे ।
युधिष्ठर पुत्तर दे सणेसे ,
कौरू – पांडू सब्बो चोर ।
बणेयों न हर पुर्जे सोत्तड़,
पैल्लां पाणा भुल्ले मोर ।
ढिल्लमढिल्ला हर पास्सा ऐ,
कवियां दी कवता कमजोर ।।

लोभी पांडे पल़चोआ दे ,
मार पल़ाट्टा पल़टोआ दे ।
नैतिकता जो दे पल़सेट्टा ,
बत्ता भुल्ले चन्द – चकोर ।
पुट्ठपल्लड़ा गद्दार गणैड्डा,
तिद्दी नीं भारत जो लोड़ ।
ढिल्लमढिल्ला हर पास्सा ऐ,
कवियां दी कवता कमजोर ।।

सा: गुगड़ीले लुट्टा करदे ,
बधदे भा$ नीं टुट्टा करदे ।
दूणीं – चौणीं करी कमाई,
खुल्लमखुल्ला पा दे शोर ।
टैक्सां च भई ला पल़चेड्डू,
लुट्टा दे देस्से जो होर ।
ढिल्लमढिल्ला हर पास्सा ऐ,
कवियां दी कवता कमजोर ।।

मोए पिच्छैं दिंदे वांगां ,
जींदे जो तां मारन डांगां ।
खंब्बल़खच्चा हर पास्सैं ए,
गल्ला परती पै घमचोल़ ।
सट्टवसट्टी लाणे ब्हाल़े,
गलांदे किछ -कमांदे होर ।
ढिल्लमढिल्ला हर पास्सा ऐ,
कवियां दी कवता कमजोर ।।

कलमां दे सच्चे मज़दूरो ,
पैसे दे उप्पर मत झूरो ।
जी- हज़ूरी दा के फाइदा ,
शोषण दा झट भांडा फोड़ ।
जित्थू दुस्सै देस – भलाई,
तित्थू ते मत मुंड मरोड़ ।
ढिल्लमढिल्ला हर पास्सा ऐ,
कवियां दी कवता कमजोर ।।

नवीन हलदूणवी
09418846773
काव्य-कुंज जसूर-176201,
जिला कांगड़ा , हिमाचल l