1974च लिक्खियो रचना
बिशम्बर नवीन
वस्सा दे रस्सा दे हस्सा दे नच्चा दे ,
रोंदे दे अत्थरू पूंहझांदा नीं कोई ।
अप्पू च लोक्की मरोआ पटोआ दे,
दूए जो इत्थू सुखांदा नीं कोई।।
लुक्का दे जाड़ां च सुच्चे लखारी,
झेड़े गरीबां दे गांदा नीं कोई ।
डोई जिस्सदैं हत्थैं सैह्-इ सिर मत्थैं,
माड़ा भई तिस्सजो गलांदा नीं कोई ।।
जुलमां दी चक्किया च पिस्सा दा माह्णू,
रपट्ट बी ठाणे लखांदा नीं कोई ।
अमीरे दी गिल्हड़ी सभनां दी बोब्बो ,
गरीबे दी काणीं बिआंह्दा नीं कोई।।
खट्टे दी खट्टी खांदी एह् दुनियां,
मधरे दी कड़छी दुआंदा नीं कोई ।
खाई-खाई कुसी जो औआ दीयां गुल्छां,
भुक्खे जो इत्थू रजांदा नीं कोई ।।
भई चलदीयां देई सभ यार हुंदे ,
माड़े जो मत्थैं लगांदा नीं कोई।
भरी-भरी उंद्दल़ां सुक्खां दी लुट्टा दे,
दुक्खां दी ढेरी बंडांदा नीं कोई ।।
ढभज्जां भरोइयो ऐ खलकत्त सारी ,
भरमां ते बैह्मां मिटांदा नीं कोई ।
‘नवीन’ झसोंदा कैंह् दुनियां जो दिक्खी,
सच्चे दे बड्ढै तां जांदा नीं कोई ।।
बिशम्बर नवीन
09418846773
काव्य-कुंज जसूर-176201,
जिला कांगड़ा , हिमाचल l
