कविता / नवीन हलदूणवी

“ओह्की जाणैं”

बगान्ने बोल बगान्ना भेस ।
ओह्की जाणैं अपणा देस??

गिटमिट-गिटमिट करदा जा दा ,
भाषा अपणी छड़दा जा दा ।
पर मातरेयां न बणदी मां ,
मां बोल्ला भौंऐं ज्हार बरेस ।।

अक्कल अपणी बन्हीं गट्ठी ,
देस बगान्ने जा दा न्हट्ठी ।
तरक्की दी ऐ इक्को गल्ल ,
जीह्बा पा दा सत्त पल़ेस ।।

अपणे जो परछंडी जा दा ,
अम्मा – बाप्पू बंडी जा दा ।
बणीं वटेरा देस्सी घुग्गा ,
बदलै करदा अपणा भेस ।।

झूठे दी तां खट्टी खा दा ,
ठगी मठूणी बट्टी जा दा ।
सैह् खड़कन्नू – भुच्चर माह्णू ,
बोल्लै करदा हऊं दरवेस ।।

पाल़ा करदा चोर – बज़ारी ,
खोट्टी तिद्दी मित्तरचारी ।
कठुग बणेयां असली तोता ,
‘नवीन’ बधा दे तांइ कलेस ।।

बगान्ने बोल बगान्ना भेस ।
ओह्की जाणैं अपणा देस??

नवीन हलदूणवी
09418846773
काव्य-कुंज जसूर- 176201,
जिला कांगड़ा , हिमाचल l

One comment

Leave a Reply

Your email address will not be published. Required fields are marked *